Shahthi Devi Stotram

।। अथ षष्ठीदेवी स्तोत्र ।। ध्यान- अपुत्राय पुत्रदाहं प्रियादात्री प्रियाय च । धनदाऽहं दरिद्रेभ्य: कर्मिभ्यश्च स्वकर्मदा ।। ।। स्तोत्र ।। नमो देव्यै महादेव्यै सिद्ध्यै शान्त्यै नमो नमः । शुभायै देवसेनायै षष्ठीदेव्यै नमो नमः ॥1॥ वरदायै पुत्रदायै धनदायै नमो नमः । सुखदायै मोक्षदायै षष्ठीदेव्यै नमो नमः ॥2॥ शक्तेः षष्ठांशरूपायै सिद्धायै च नमो नमः । मायायै सिद्धयोगिन्यै षष्ठीदेव्यै नमो नमः ॥3॥ पारायै पारदायै च षष्ठीदेव्यै नमो नमः । सारायै शारदायै च पारायै सर्वकर्मणाम् ॥4॥ बालाधिष्ठातृदेव्यै च षष्ठीदेव्यै नमो नमः । कल्याणदायै कल्याण्यै फलदायै च कर्मणाम् ।।5।। प्रत्यक्षायै च भक्तानां षष्ठीदेव्यै नमो नमः। पूज्यायै स्कन्दकान्तायै सर्वेषां सर्वकर्मसु ।।6।‌। देवरक्षणकारिण्यै षष्ठीदेव्यै नमो नमः ॥ शुद्धसत्त्वस्वरुपायै वन्दितायै नृणां सदा ।।7।। हिंसाक्रोधर्वर्जितायै षष्ठीदेव्यै नमो नमः । धनं देहि प्रियां देहि पुत्रं देहि सुरेश्वरि ।।8।। धर्मं देहि यशो देहि षष्ठीदेव्यै नमो नमः । भूमिं देहि प्रजां देहि देहि विद्यां सुपूजिते ।।9।। कल्याणं च जयं देहि षष्ठीदेव्यै नमो नमः। इति देवीं च संस्तूय लेभे पुत्रं प्रियव्रतः । यशस्विनं च राजेन्द्रं षष्ठीदेवीप्रसादतः ॥10॥ षष्ठीस्तोत्रमिदं ब्रह्मन् य: शृणोति च वत्सरम् । अपुत्रो लभते पुत्रं वरं सुचिरजीविनम् ॥11॥ वर्षमेकं च या भक्त्या संयतेदं शृणोति च । सर्वपापाद्विनिर्मुक्ता महावन्ध्या प्रसूयते ॥12॥ वीरपुत्रं च गुणिनं च विद्यावन्तं यशस्विनम् । सुचिरायुष्मन्तमेव षष्ठीमातृप्रसादतः ॥13॥ काकवन्ध्या च या नारी मृतापत्या च या भवेत् । वर्षं श्रुत्वा लभेत्पुत्रं षष्ठीदेवी प्रसादतः ॥14॥ रोगयुक्ते च बाले च पिता माता शृणोति च । मासं च मुच्यते बालः षष्ठीदेवीप्रसादतः ॥15॥ ।।श्री षष्ठी देवीस्तोत्र सम्पूर्णम्।।